Siririingka iti nakem ti ili, Apo Ferdinand!ni Joel B. Manuel, CTE alumnus
September 30, 2009
Naisangayan a daga, naisalumina a pagilian,
No lumtuad ti nakem iti puli a kalalakian
Kas karasay ti panagsabong ti kawayan
No dumteng panawen ti maysa a Ferdinand
Rimat, batonsileng, manmano a partuaten panawen
Sika ta sika latta minuli daga dagiti patneng
Pinutar ti pakasaritaan a panuli dagiti pagteng
Ferdinand Marcos a daton Kailokuan nga ilalaen
Henio a ginamay kina-Ilokano, tagibi’t dara ti Amianan
Mano a siglo nga inuraynaka agib-ibtur a kakailian?
Idi timpuarka a kas bullalayaw kalpasan bayakabak
Ammo idin ti ili naipasngayen salakanna ken ragsak
Managparnuay a siribmo, idi, ita kaanoman
Dinton maulit a sumiray ti kas kenka a nagaladan
Siglatmo iti linlinteg, panagiyebkas, diplomasia, sirmatam
Leyenda, sabong-dila ti ili, sumarsaruno iti pagsidsiddaawan
Siasinno ti nangsirmata rabii a nayaon ken sipnget
Sika ti nangkoriente, nangbibineg industria ken dur-as
Awan koma ti nam-ay ti ili ita ken inton bigat
No saanmo a pinuligos turbina a nangsindit’ rang-ay!
Patiek, saan a mabisin umariyekyek a tao ti pagilian
Idi pay a nasirmatam kisang banga ken pagbagasan
Impasdekmo dagiti penned a nagbalin a pagsidsiddaawan
Mangpainum taltalon tantanap Mindanao ken Cagayan
Ubonem man amin naparaburan nga utek ita ken idi
Maysaka a mangilinlinteg amin a pagsayaatan umili
Duaribu a dekreto presidensial, maigiddiat, agsusupadi
Ken limaribu a paglintegan pay a mangrienda iti ili
Anansata, utang amin pagilian adu a paglintegan
Kodigo’t panagbuis, kodigo’t trabaho, kodigo’t ubbing man
Modernoka a Hammurabi, awan aspeto nga inka linibtawan
Balido agingga ita dandani amin a linteg a pinarmatam!
Salun-at ti gimong, maysa nga utang ita kinaindaklan
Dagiti espesialista nga ospital itan a pagsadsadagan
Heart Center, Lung Center, Kidney Center a kamangan
Naindaklanka, mangngagas, nangato a doktor a di nalisensiaan!
Awan sirib ken utek a di sinagid dagita imam, Apo Ferdinand
Maysaka nga edukador, awan nangartap iti utek-sirmatam
Unibersidad dagiti umili, unibersidadmi a taga-Amianan
Taeng-sirib a binangonmo, eskuelaan a tampok utek kalalakian
Wen pudno, impasdekmo MMSU a daton-sirib Kailokuan
Pagsukisokan-pagipatawidan kultura, siensia a pagpuonan
Behikulo a magneto-guyod dur-as ti kagimongan
Maikapat a buridekmo, tinagibim a pinuypuyatan!
Ita, adtoy ti saludsodko sapay koma ita siribmo sungbatam
Apay apay ngata a nasabrak keddeng ti pagilian
Kenka a nangidaton bileg, sirib, regget ken kinaridam
Tapno rumang-ay ken bumileg sinalsaluadam a pagilian?
Nakabasolka aya iti kolektibo a konsiensia ti ili
Kadagiti usuatmo nga immuna iti panawenda, nasudi,
Apay a binallikogda a babakmo ti manayon a panangigigi
Kadagiti ganuat a sakbay panawenda, paginamayan umili?
Apo Ferdinand, adda koma gayuma dagitoy a balikas
Ta ungapenna dagita nay siisem a bibig, maukas
Warwarem ti simpuon dagitoy pananglikud napalabas
Tapno pusok a maduddudog, panawan koma ti apas,
Ngem ala wen, no saan man ita a bigbigen ili ti gapuanam
Patiek nalag-anto ngem nabuddak tugot ti pluma pakasaritaam
Ta uray pay punasenda nga iridep dagiti lanadmo a naindaklan
Siririingka iti nakem ti ili patgenmi nga Apo Ferdinand!